Майкл Кэррик "Манчестер Юнайтед" бош мураббийлигидаги вазифаси ҳақида гапирди.
13 январь куни "қизил иблислар" 44 ёшли мутахассис билан 2025/26 йилги мавсум охиригача шартнома имзолаганини эълон қилди.
"Манчестер Юнайтед"ни бошқариш масъулиятини ўз зиммамга олиш мен учун катта шараф. Бу клубда муваффақиятга эришиш учун нималар талаб этилишини биламан, ҳозир бор эътиборим футболчиларнинг бу буюк жамоадан кутаётган даражага чиқишига ёрдам беришга қаратилган", - дея Кэррикнинг сўзларини келтиради "МЮ" матбуот хизмати.
Мураббий жамоанинг ҳозирги ўйинчиларининг истеъдоди, садоқати ва қобилиятига мутлақо ишонишини таъкидлади.
"Бу мавсумда биз ҳали курашишимиз керак бўлган нарсалар бор. Биз барчани бирлаштиришга ва мухлисларга уларнинг фидокорона қўллаб-қувватлашига лойиқ ўйинни тақдим этишга тайёрмиз", - дея қўшимча қилди у.
Кэррик 2006 йилдан 2018 йилгача "қизил иблислар" сафида ўйнаган ва жамоа билан бирга 17 та совринни қўлга киритган.
