"Манчестер Сити"нинг янги аъзоси Антуан Семеньо Лига кубоги биринчи яримфиналидан ўрин олган "Ньюкасл"га (2:0) қарши ўйиндан сўнг ўз таассуротлари билан ўртоқлашди. 26 ёшли вингер "шаҳарликлар" сафида асосий таркибда майдонга тушди ва ўйин охирига қадар ҳаракат қилди.

Айнан ганалик футболчи 53-дақиқада рақиб дарвозасини ишғол қилиб, ҳисобни очди.

"Қийин ўйин, аммо ўз фикримизда қатъий турсак, имкониятлар пайдо бўлишини билардик. Мен керакли жойда бўлдим ва гол ура олдим, биз ғалаба қозондик. Мен жуда мамнунман.

"Борнмут"да орттирган ишончимни бу ерга олиб келдим ва юзларимда табассум билан ўйнашда давом этяпман. Ҳар бир сониядан завқланаман", - деди Семено Sky Sports’га берган интервьюсида.