Аввал Россия шарафини ҳимоя қилган, жаҳон рейтингида 93-ўринда бораётган теннисчи Камилла Раҳимова "First&Red"га берган интервьюсида Ўзбекистон терма жамоасига ўтиш қарорини қандай қабул қилгани ҳақида сўзлаб берди.

У ўтган йил декабрь ойида спорт фуқаролигини ўзгартирди.

— Аслида менга Ўзбекистон федерациясидан мурожаат қилишди. Ўзбекистонда теннисни ривожлантиришга ёрдам бериш ҳақида таклиф бўлди. Узоқ ўйладим, тарозуга солиб кўрдим. Бу мен учун жуда муҳим қадам эди. Мен бутун юниорлик фаолиятим давомида Россия учун иштирок этганман. Афсуски, Fed Cup’да ўйнамаганман, яъни расман «боғланиб қолмаганман». Шунинг учун ҳам, ўйлайманки, менга шундай таклиф билан чиқишган. Биз ўйлаб кўрдик, мулоҳаза қилдик ва мен бу қарорга келишга рози бўлдим. Карьера битта, ундан барчасини олишни истайсан. Қолаверса… Ўзбекистон мен учун мутлақо бегона мамлакат эмас. Онам ўша ердан, у ерда қанча йил яшаган — тахминан 25 йилча, буви-буваларим ҳам ўша ерда. Болалигимда у ерга тез-тез бориб турардим, кўп вақт ўтказганман. Шунинг учун «ҳа» дедим.

— Бу қарорни қабул қилишдан олдин узоқ ўйладингми?
— Тахминан, билмадим, тўрт ойча.

— Бу масалани оиланг билан муҳокама қилдингми ёки фақат ўзинг ўйлаб ҳал қилдингми?
— Албатта, муҳокама қилдим — ҳам оилам билан, ҳам жамоам билан. Лекин, эҳтимол, кўпроқ оилам билан. Барибир энг муҳим сўз мен томондан айтилди.

— Ҳис-туйғуларда қандайдир ўзгариш борми? Балки кортда нимадир ўзгаргандир? Ёки ҳаммаси аввалгидекми?
— Фақат ҳозир англаб етдимки, назаримда, кеча менинг биринчи расмий ўйиним бўлди. Чунки йил охирида ҳам ўйнаганман, аммо Ўзбекистон матбуот хизмати мен ўтганим ҳақида хабарни эълон қилганди. Ўша турнирни эса ҳали байроқсиз ўйнаганман ва уни ютганман («Челленджер» Анже шаҳрида). Лекин мукофотлаш маросимида Ўзбекистон элчиси қатнашган эди. Бу янгилик барча каналлар, барча ОАВлар орқали тарқалди. Шундан кейин бошқа турнирлар бўлмади, демак кечаги ўйин биринчи бўлди. Фақат қўллаб-қувватлаш ва эътибор бироз кўпайди. Чунки сен мамлакатнинг ўнинчи ракеткаси бўлсанг, сендан нимадир кутишади. Нимадир исташади, қаердадир танқид қилишади, қаердадир муҳокама қилишади — ҳаёт шундай.