«Ливерпуль»нинг собиқ бош мураббийи Юрген Клопп Германияда янги футбол лигасини яратиш режалари устида иш олиб бормоқда. Бу ҳақда Bild нашри хабар бермоқда.

Манбага кўра, Клопп Бундеслигага ўтишдан олдин ёш футболчиларга муҳим тажриба тўплашга ёрдам берадиган U21 лигасини ташкил этишни мақсад қилган. У мазкур ташаббус устида Маркус Крёше, Сами Хедира, Андреас Реттиг ва Марк Ленц билан ҳамкорликда ишламоқда. Қайд этилишича, янги лига ғояси ёш иқтидорларнинг асосий жамоаларга кириб бориши тобора қийинлашиб бораётгани билан боғлиқ хавотирлар фонида пайдо бўлган.

Ташкилотчилар фикрича, амалдаги тизимда қатор камчиликлар мавжуд: Европадаги энг самарали 100 та академия қаторига Германиядан бор-йўғи 9 та академия киради, Бундеслигада Европанинг беш етакчи лигаси орасида ўз тизимида тарбияланган ўйинчилар сони энг кам, шунингдек, Бундеслигадаги ўйин вақтининг 85 фоизи академиядан ўтмаган футболчилар ҳиссасига тўғри келади.

Айни пайтда Юрген Клопп Red Bull тузилмасида футбол йўналиши бўйича глобал раҳбар лавозимини эгаллаб турибди.