«Вердер» Бундеслиганинг 20-турида Менхенгладбахнинг «Боруссия»си билан 1:1 ҳисобида дуранг ўйнаганидан сўнг бош мураббий Хорст Штеффен билан хайрлашишга қарор қилди.
Бу ҳақда якшанба куни клуб спорт директори Клеменс Фритц маълум қилди. Ушбу ўйин «Вердер» учун Германия чемпионатида кетма-кет ғалабасиз ўтган 10-учрашув бўлди. Жамоа 7 ноябрдан бери ғалаба қозона олмаяпти ва ҳозирда турнир жадвалида 15-ўринни эгаллаб турибди.
Штеффен «Вердер»га ўтган ёзда «Эльферсберг»дан келган эди. Унинг қўл остида жамоа Бундеслигада 20 та ўйин ўтказиб, 4 марта ғалаба қозонди, 7 бор дуранг ўйнади ва 9 марта мағлуб бўлди.
Мавсумнинг қолган қисмида «Вердер»ни вақтинча мураббий ёрдамчилари — Рафаэль Дуарте ва Кристиан Гросс бошқаради.
