НФЛ 2026 йилдан бошлаб Мадридда мунтазам мавсум ўйинларини ўтказиш бўйича кўп йиллик келишув тузилганини эълон қилди. Учрашувлар «Реал»нинг уй стадиони — «Сантьяго Бернабеу»да бўлиб ўтади.

НФЛнинг Мадриддаги илк ўйини 2025 йилда ўтган. Лига Испанияни халқаро бозордаги устувор йўналишлардан бири деб ҳисоблайди: НФЛ баҳолашига кўра, мамлакатда тахминан 11 миллион мухлис бор.

Узоқ муддатли ривожланиш стратегияси доирасида НФЛ Испанияда флаг-футболни оммалаштиришни режалаштирмоқда. NFL Flag дастури 2024 йилда ишга туширилган ва ҳозирда Испания Америка футболи федерацияси қўллаб-қувватловида Мадрид, Барселона ва Сарагоса мактабларида амал қилмоқда.

Ҳозирча 2026 йил мавсумида Мадридда мунтазам чемпионатнинг битта ўйини ўтиши тасдиқланган. Қатнашувчи жамоалар, сана ва бошланиш вақти кейинроқ — мавсумнинг тўлиқ тақвими билан бирга эълон қилинади.