Ҳужумчи Карим Бензема «Ал-Иттиҳод»дан «Ал-Ҳилол»га ўтгандан сўнг ўз фикрлари билан ўртоқлашиб, янги жамоасини Мадриднинг «Реал»и билан қиёслади.

«Бу бой тарихга эга, кўплаб совринларни қўлга киритган яхши жамоа. Улар Осиёдаги “Реал Мадрид”га ўхшайди. Ҳаммаси жойида, мухлислар ажойиб, жамоа жуда яхши ўйнайди, таркибда тўғри руҳиятга эга сифатли футболчилар бор.

Бу жамоа менга аввал ҳам ёқарди. “Реал Мадрид” сафида ўйнаган пайтимда уларга қарши майдонга тушганман ва ўша ўйин осон кечмаган. Бу яхши учрашув эди ва менда ёқимли хотиралар қолган. Бугун эса бахтиёрман, чунки “Ал-Ҳилол” сафида ўйнаяпман», — дея Бенземанинг сўзларини келтиради унинг янги клуби расмий сайти.

Бензема 2023 йил ёзидан бери Саудия Арабистони чемпионатида тўп суриб келмоқда, у Мадриднинг «Реал» клубидан «Ал-Иттиҳод»га ўтган эди. Испания клуби сафида франциялик футболчи Чемпионлар лигасини беш марта қўлга киритган, шунингдек, «Олтин тўп» соҳиби бўлган. Жорий мавсумда у барча мусобақаларда клуб учун ўтказилган 21 та учрашувда 16 та гол муаллифи бўлган.