Трансфер ойнасининг сўнгги кунида «Ан-Наср» ҳужумчиси Жон Дуран Англия Премьер-лигасига кўчиб ўтиши мумкин эди.
Инсайдер Фабрицио Романонинг таъкидлашича, 22 ёшли колумбиялик футболчининг хизматлари Лондоннинг «Тоттенхэм» клубига таклиф қилинган. Дураннинг ўзи «шпорлар» сафига ижара асосида ўтишга қизиқиш билдирган эди, бироқ пойтахт жамоаси бор эътиборини Коло-Муанини сақлаб қолишга қаратишга қарор қилди.
Кутилишича, Дуран мавсумнинг қолган қисмини Санкт-Петербургнинг «Зенит» клубида ўтказади. Яқин вақт ичида томонлар барча зарур ҳужжатларни имзолашлари керак.
Мавсумнинг биринчи ярмини Дуран ижара асосида «Фенербахче»да ўтказди. Унинг ҳисобида 21 та ўйин, бешта гол ва учта голли узатма мавжуд.
