«Челси» ярим ҳимоячиси Коул Палмер фаолияти давомида илгари ҳеч қачон бундай жароҳатлар билан боғлиқ муаммоларга дуч келмаганини маълум қилди.

Шанба куни 23 ёшли футболчи Премьер-лига доирасида «Вулверхэмптон»га қарши кечган ўйинда (3:1) хет-трик қайд этди. Инглиз футболчиси ҳар учтала голни ҳам биринчи бўлимнинг ўзидаёқ киритди, улардан иккитасини пенальтидан амалга оширди.

«Ушбу мавсумгача фаолиятим давомида жароҳатлар билан боғлиқ муаммолар бўлмаган эди. Мен учун бу янгилик ва мен ҳали ҳам бундай вазиятлар билан қандай курашишни ўрганяпман. Албатта, бу кишини хафа қилади. Ўйлашимча, бу мавсумда бирорта ҳам ўйинга 100 фоиз тайёр ҳолатда етиб келмадим. Майдонга тушар эканман: «Буни қила оламанми, уни-чи?» деб ўйлайман. Бу ҳақда ҳаддан ташқари кўп бош қотиряпман», – дея Палмернинг сўзларидан иқтибос келтирмоқда «Челси» матбуот хизмати.