Франция Лига 1 раҳбарияти январь ойи якунларига кўра энг яхши футболчи совринига даъвогар бўлган уч нафар ўйинчи исмини эълон қилди. Номинацияга «Лион»нинг икки вакили — Эндрик ва Павел Шульц лойиқ кўрилди. Уларга «Марсель» аъзоси Мэйсон Гринвуд рақобатчилик қилади.
Қишки трансфер ойнаси вақтида Эндрик «Реал Мадрид»дан «Лион»га ижара асосида ўтган эди. «Тўқувчилар» сафидаги дастлабки олтита ўйинда бразилиялик иқтидор бешта гол урди ва битта голли узатмани амалга оширди. Шанба куни «Нант»га қарши кечган баҳсда Эндрик қизил карточка олиб, майдонни тарк этди.
