«Атлетико» жамоа сардори Коке томонидан майдон ҳолати танқид қилинганига қарамай, «Метрополитано» стадионидаги майсани (газонни) алмаштирмайдиган бўлди.

Ла Лиганинг 23-турида «Бетис»дан учралган мағлубиятдан (0:1) сўнг мадридликлар сардори шундай деган эди: «Атлетико» ўйин кўрсатиши учун юқори сифатли майдон керак. У жуда ёмон ҳолатда, сирпаниб кетяпмиз, бир тегишда ўйнай олмадик».

«Marca» нашрининг хабар беришича, мавсум якунига қадар «Метрополитано»да чимни алмаштириш режалаштирилмаган. «Атлетико» раҳбариятининг таъкидлашича, майдон ҳолатига Мадридда сўнгги ҳафталарда кузатилган ноқулай об-ҳаво шароити, жумладан ёмғир, қор ва паст ҳарорат салбий таъсир кўрсатган.

Қайд этилишича, мавсум охиригача «Атлетико» ўз уй стадионида Испания Кубоги ва Чемпионлар Лигасидаги иштирокига қараб 9 тадан 12 тагача ўйин ўтказади.