«Барселона» марказий ҳимоячиси Пау Кубарси жамоа жорий мавсум давомида ниманинг ҳисобига ўсишга эришгани ҳақида гапириб берди.

Ноябрь ойида «Челси»дан қабул қилинган мағлубиятдан (0:3) сўнг, Ханс-Дитер Флик шогирдлари ҳайратланарли спорт формасига кириб олишди ва барча мусобақалардаги 18 та ўйиннинг 17 тасида ғалаба қозонишди.

«Биз айрим деталларга тузатиш киритдик, бу эса натижаларни яхшилаш имконини берди. Ўзгаришлардан сўнг дарҳол яхшироқ ўйнай бошладик ва мураббийлар штаби бизга етказган фалсафага ишондик. Ўшандан бери биз ўсишда давом этмоқдамиз ва ўзимизга бўлган ишонч тобора ортиб бормоқда», — дея «Barca Universal» Кубарсининг сўзларини келтирмоқда.

Пайшанба куни, 12 февраль санасида, «кўк-анорранглилар» Испания Кубогининг дастлабки ярим финал учрашуви доирасида Мадридда «Атлетико»га қарши майдонга тушади.