"Барселона"нинг собиқ футболчиси Самуэль Юмтити Лионель Мессининг менталитети ҳақида ўз фикрларини билдириб ўтди.

"Месси ўйин тақдирини ҳал қила олади ва бундай иқтидор эгалари жуда кам. Агар биз 4:0 ҳисобида ғалаба қозонаётган бўлсак-у, у гол урмаган бўлса, ундан норози бўларди. Унинг фикри-хаёлида доим гол уриш керак деган тушунча бор эди. Бу буюклик белгисидир. У дарвоза олдида ҳақиқий "қотил". У ўйинни қачон тезлаштириш ва қачон секинлаштириш кераклигини аниқ билади. У доимо атрофга қараб, футболчиларнинг жойлашувини баҳолаб юради. Леога қарши ҳимояланишнинг тайёр рецепти йўқ, у — олдиндан айтиб бўлмас футболчи", — деди Юмтити "The Elevate House" нашрига.

Лионель Месси ҳозирда "Интер Майами" сафида тўп сурмоқда. Аргентиналик юлдуз фаолияти давомида саккиз марта "Олтин тўп"ни қўлга киритган.