«Динамо» жамоаси БААдаги 2-йиғини доирасидаги иккинчи ўртоқлик ўйинини Ереваннинг «Пюник» жамоасига қарши ўтказди.

Ажманда ўтган баҳснинг биринчи бўлимида ҳисоб очилмаган бўлса, иккинчи бўлимда Вадим Абрамов таркибда бир қатор ўзгаришларга қўл ургач, вакилларимиз тўлиқ устунлик билан ғалабага эришишди.

Анваржон Ҳожимирзаевнинг узатмасидан кейин дастлаб Фирдавс Абдураҳмонов ҳисобни очган бўлса, кўп ўтмай Анваржоннинг ўзи ажойиб зарбаси билан фарқни иккитага етказди. Кўп ўтмай, яна Анваржоннинг иккинчи узатмасидан кейин Хислат Халилов чиройли голга муаллифлик қилиб, ҳисобни йириклаштирди – 3:0.

Шу тариқа, «Динамо» Арманистоннинг 13 карра чемпиони «Пюник»ни йирик ҳисобда мағлуб этди.

Халқаро ўртоқлик ўйини. Ажман, БАА
11 феврал (чоршанба)
Пюник (Ереван) – Динамо (Самарқанд) – 0:3
Голлар: Фирдавс Абдураҳмонов 52, Анваржон Ҳожимирзаев 65, Хислат Халилов 74
«Динамо»: Равшанбек Ягудин, Улуғбек Абдуллаев, Маҳаммаду Дембеле, Жаҳонгир Ўрозов, Мауро Бразил, Тил Мавретич, Акбар Худойбердиев, Нурилло Тўхтасинов, Расул Йўлдошев, Бектемир Абдуманнонов, Миржаҳон Мираҳмадов.
Захирадан майдонга тушганлар: Санжар Қодирқулов, Жалолиддин Жумабоев, Драмане Салоу, Жаҳонгир Абдусаломов, Фирдавс Абдураҳмонов, Хислат Халилов, Азизбек Амонов, Анваржон Ҳожимирзаев, Улуғбек Ҳошимов.