«Манчестер Сити» ҳужумчиси Эрлинг Холанд узоқ танаффусдан сўнг илк бор Премьер-лигада ўйиндан гол уришга муваффақ бўлди.
25 ёшли футболчи «Фулхэм»га қарши кечган баҳснинг (3:0) биринчи бўлими охирида якуний ҳисобни ўрнатди ва танаффусдаёқ захирага олинди. Норвегиялик ҳужумчи чемпионат доирасида ўтган йилнинг 20 декабридан бери илк бор ўйиндан (пенальтисиз) гол урди. Унинг муваффақиятсиз серияси саккизта ўйин давом этган эди.
Эрлинг Холанд АПЛнинг жорий мавсумидаги тўпурарлар пойгасида 26 та учрашувда 22 та гол билан пешқадамлик қилмоқда. У энг яқин таъқибчиси — «Брентфорд» ҳужумчиси Игор Тьягони бешта голга ортда қолдирмоқда.
