Англия терма жамоаси бош мураббийи Томас Тухель, афтидан, 2026 йилги Жаҳон чемпионати олдидан кадрлар сиёсатида кутилмаган бурилиш ясашга тайёрланмоқда. Британия манбаларининг хабарига кўра, ярим ҳимоячи Жуд Беллингем ҳозирча миллий терма жамоанинг узоқ муддатли лойиҳасидаги асосий фигуралар қаторига кирмаяпти.
Хабар қилинишича, мураббийлар штабида футболчининг келажакдаги ўйин моделидаги роли борасида шубҳалар пайдо бўлган. Ўз авлодининг энг ёрқин футболчиларидан бири мақомига эга бўлиши ва терма жамоага мунтазам чақирилишига қарамай, унинг истиқболли таркибдаги ўрни энди дахлсиз бўлиб кўринмаяпти.
Вазиятни «Реал Мадрид» хавбекининг айни дамдаги жисмоний ҳолати ҳам мураккаблаштирмоқда. Сўнгги маълумотларга кўра, жароҳатдан кейинги тикланиш жараёни тахминан икки ойга чўзилиши мумкин, шу сабабли унинг майдонга қайтиши апрель ойига яқин кутилмоқда. Жорий мавсумда 22 ёшли ярим ҳимоячи барча турнирларда 28 та ўйин ўтказиб, олтита гол ва тўртта голли узатмани амалга оширди.
2026 йилги Жаҳон чемпионати 11 июндан 19 июлга қадар АҚШ, Канада ва Мексикада бўлиб ўтади.
