Лондоннинг "Арсенал" клуби бош мураббийи Микель Артета Англия лига кубогини қўлга киритишга қатъий қарор қилган. Бу ҳақда "The Touchline" нашри хабар бермоқда.
Манба берган маълумотларга кўра, Артета турнир финалида "шаҳарликлар"га қарши кечадиган баҳсни "Арсенал" учун мавсумнинг белгиловчи лаҳзаси деб ҳисоблайди. Испаниялик мутахассиснинг ишончи комилки, мағлубият жамоанинг руҳий ҳолатига жиддий путур етказиши мумкин, ғалаба эса уларни Премьер-лига чемпионлиги учун курашда руҳлантириб юборади. Мураббий финал олдидан асосий ўйинчиларга дам беришга тайёр.
"Арсенал" ва "Манчестер Сити" ўртасидаги Лига кубогининг ҳал қилувчи учрашуви 22 март куни бўлиб ўтади. Ўйин Тошкент вақти билан соат 21:30 да бошланиши режалаштирилган.
