«Тоттенхэм»нинг янги бош мураббийи Игор Тудор бўлди. Хорватиялик мутахассис Лондон клуби билан мавсум якунига қадар мўлжалланган шартнома имзолади. «Шпорлар» ҳатто Тудорнинг олдига қўйилган вазифани ҳам маълум қилишди.

«Унинг вазифаси аниқ — мавсумнинг ҳал қилувчи палласида жамоага ташкилотчилик, шиддат ва рақобатбардошликни олиб кириш», — дейилади Лондон клуби расмий сайтида.

Премьер-лиганинг ўтган турида «Тоттенхэм» ўз майдонида «Ньюкасл»га 1:2 ҳисобида имкониятни бой берди. Эртаси куни Лондон клуби Томас Франкнинг истеъфога чиқарилганини эълон қилди. Ҳозирда «шпорлар» чемпионат турнир жадвалида атиги 16-ўринни эгаллаб туришибди.

«Тоттенхэм» навбатдаги ўйинини 22 февраль куни «Арсенал»га қарши ўтказади.