"Манчестер Юнайтед" ярим ҳимоячиси Мэйсон Маунтнинг келажаги ноаниқлигича қолмоқда.
27 ёшли футболчи учун Майкл Кэррик тизимида асосий таркибдан жой олиш қийин кечмоқда, чунки "ўнлик" позицияси жамоанинг асосий юлдузи ва сардори — Бруну Фернандеш томонидан банд этилган. Инглиз ОАВларининг хабарига кўра, "қизил иблислар" Маунтни тахминан 20 миллион фунт стерлинг (23 миллион евро) эвазига сотиш имкониятини кўриб чиқишлари мумкин.
"Transfermarkt" порталида ярим ҳимоячининг қиймати юқорироқ — 32 миллион еврога баҳоланган. "Челси" собиқ футболчисининг амалдаги меҳнат шартномаси 2028 йилгача мўлжалланган бўлиб, унда келишувни яна бир йилга узайтириш имконияти ҳам мавжуд.
