«Манчестер Сити» бош мураббийи Пеп Гвардиола мавсумнинг якуний қисми олдидан жамоасининг мақсадлари ва руҳий ҳолати ҳақида тўхталиб ўтди. Тажрибали мутахассиснинг фикрича, энди ҳар бир учрашув жамоа учун финалга тенг.
Гвардиоланинг таъкидлашича, мавсумнинг сўнгги уч ойига етиб келганда ҳеч кимнинг хато қилишга ҳаққи йўқ. Агар жамоа мағлубиятга учраса, совринлар учун курашдан чиқиб кетиши мумкин. Унинг учун нафақат «Арсенал»га қарши бўладиган Лига кубоги финали, балки ҳар бир баҳс худди финалдек аҳамиятли.
«Март ойида осмон янада мовийроқ, об-ҳаво эса яхшироқ бўлади. Бу вақтда кайфият ҳам тамомила ўзгаради. Ҳозирги паллада муҳим нуқтада бўлиш жуда зарур ва жамоа бунга тайёр бўлади. Биз буни уддалай олишимизга ишонаман», — дейди Пеп.
