«Manchester Siti» bosh murabbiyi Pep Gvardiola mavsumning yakuniy qismi oldidan jamoasining maqsadlari va ruhiy holati haqida to‘xtalib o‘tdi. Tajribali mutaxassisning fikricha, endi har bir uchrashuv jamoa uchun finalga teng.
Gvardiolaning ta’kidlashicha, mavsumning so‘nggi uch oyiga yetib kelganda hech kimning xato qilishga haqqi yo‘q. Agar jamoa mag‘lubiyatga uchrasa, sovrinlar uchun kurashdan chiqib ketishi mumkin. Uning uchun nafaqat «Arsenal»ga qarshi bo‘ladigan Liga kubogi finali, balki har bir bahs xuddi finaldek ahamiyatli.
«Mart oyida osmon yanada moviyroq, ob-havo esa yaxshiroq bo‘ladi. Bu vaqtda kayfiyat ham tamomila o‘zgaradi. Hozirgi pallada muhim nuqtada bo‘lish juda zarur va jamoa bunga tayyor bo‘ladi. Biz buni uddalay olishimizga ishonaman», — deydi Pep.
