Англия терма жамоасининг собиқ футболчиси Гари Линекер УЕФА Чемпионлар лигасининг дастлабки ўтиш ўйини доирасидаги Лиссабоннинг «Бенфика» ва Мадриднинг «Реал» клублари ўртасидаги баҳсда юз берган можарога муносабат билдирди. Учрашув давомида «қаймоқранглилар» ҳужумчиси Винисиус Жуниор ирқчилик руҳидаги ҳақоратларга дучор бўлди.
«Винисиус ажойиб гол урди ва уни нишонлай бошлади. Шундан сўнг, унинг сўзларига кўра, «Бенфика» футболчиси бразилияликни ҳақорат қилган. Буни исботлаш осон бўлмайди, аммо ирқчиликнинг ҳар қандай кўриниши ўйинга ёмон таъсир қилади. Бу аллақачон футбол доирасидан чиқиб кетмоқда», — деди эксперт «The Rest is Football» ютуб-каналида.
Матч «Реал»нинг 1:0 ҳисобидаги минимал ғалабаси билан якунланди. Жавоб учрашуви «Сантьяго Бернабеу» стадионида бўлиб ўтади.
