Олмалиқнинг OKMK жамоаси янги мавсум олдидан таркиб барқарорлигини таъминлаш йўлида муҳим қадам ташлади. «Кончилар» бир вақтнинг ўзида тўрт нафар асосий футболчиси билан амалдаги шартномаларни узайтирди.

Жамоанинг ҳужумкор ярим ҳимоячилари — Азиз Холмуродов ва Нодирбек Абдураззоқов билан 4 йиллик янги битим имзоланди. Унга кўра, ҳар икки футболчи 2029 йил якунига қадар клуб шарафини ҳимоя қилади. Холмуродов ўзининг креатив ўйини ва майдондаги фаоллиги билан мухлислар меҳрини қозонган бўлса, Абдураззоқов меҳнаткашлиги, техникаси ва жамоавий ўйинга мослашувчанлиги билан мураббийлар ишончини оқлаб келмоқда.

Шунингдек, ҳимоя чизиғи вакиллари Аброp Каримов ҳамда Саидафзалхон Аҳроров билан ҳам келишувлар янгиланди. Каримов 2029 йил охирига қадар жамоа сафида қолади. У интизоми, ҳаводаги яккакурашлардаги устунлиги ва ўйинни яхши ўқиши билан мудофаанинг таянч нуқтасига айланган.

Аҳроров эса 3 йиллик шартнома имзолади ва 2028 йил якунигача «кончилар» шарафини ҳимоя қилади. Унинг тактик интизоми, позиция танлашдаги аниқлиги ва рақиб ҳужумларини бартараф этишдаги ишончли ҳаракатлари жамоа ҳимояси барқарорлигида муҳим аҳамият касб этади.

Шу тариқа, «кончилар» асосий таркиб ўзагини сақлаб қолиш орқали янги мавсум олдидан барқарор ва рақобатбардош жамоа шакллантиришни мақсад қилган.