«Комо» Италия чемпионатининг 26-тури доирасидаги «Ювентус»га қарши ўйин учун қайдномасини эълон қилгач, клубга 3 нафар футболчи ёрдам бера олмаслиги маълум бўлди. Бу ҳақда Football Italia хабар бермоқда.

Аргентиналик ярим ҳимоячи Нико Пас карточкалари кўпайиб кетгани сабабли ўйинни ўтказиб юборади. «Милан» билан кечган ўтган баҳсдаги (1:1) огоҳлантириш футболчи учун ҳал қилувчи бўлди. Шунингдек, соғлиғида муаммоси бўлган нидерландиялик вингер Жейден Аддай ва италиялик ҳимоячи Эдоардо Гольданига ҳам майдонга тушмайди.

Шуни қўшимча қилиш керакки, испаниялик ҳужумчи Альваро Мората дисквалификацияни ўтаб бўлгач, таркибга қайтмоқда.

Сеск Фабрегас шогирдлари айни дамда турнир жадвалида олтинчи ўринда боришмоқда ва «Ювентус»дан 4 очкога ортда қолишмоқда. «Комо»нинг рақиби кетма-кет 4 та ўйиндан бери ғалаба қозона олмаяпти.