«Komo» Italiya chempionatining 26-turi doirasidagi «Yuventus»ga qarshi o‘yin uchun qaydnomasini e’lon qilgach, klubga 3 nafar futbolchi yordam bera olmasligi ma’lum bo‘ldi. Bu haqda Football Italia xabar bermoqda.

Argentinalik yarim himoyachi Niko Pas kartochkalari ko‘payib ketgani sababli o‘yinni o‘tkazib yuboradi. «Milan» bilan kechgan o‘tgan bahsdagi (1:1) ogohlantirish futbolchi uchun hal qiluvchi bo‘ldi. Shuningdek, sog‘lig‘ida muammosi bo‘lgan niderlandiyalik vinger Jeyden Adday va italiyalik himoyachi Edoardo Goldaniga ham maydonga tushmaydi.

Shuni qo‘shimcha qilish kerakki, ispaniyalik hujumchi Alvaro Morata diskvalifikasiyani o‘tab bo‘lgach, tarkibga qaytmoqda.

Sesk Fabregas shogirdlari ayni damda turnir jadvalida oltinchi o‘rinda borishmoqda va «Yuventus»dan 4 ochkoga ortda qolishmoqda. «Komo»ning raqibi ketma-ket 4 ta o‘yindan beri g‘alaba qozona olmayapti.