Испаниянинг "Sport" нашри ярим ҳимоячи Гавининг "Барселона"ни тарк этишига бир бахя қолгани ҳақида мақола эълон қилди. Воқеа 2023 йилда, каталонияликлар ярим ҳимояни кучайтиришни истаган, аммо янги футболчилар сотиб олишга маблағлари бўлмаган вақтда юз берган. Ўшанда "кўк-анорранглилар" Фабиан Руисни ўз сафига қўшиб олмоқчи бўлишган, Гави эса ушбу келишувнинг бир қисмига айланиши мумкин эди.

Режага кўра, Фабиан Руис ва Марко Верратти "Барселона"га ўтиши, Гави эса "ПСЖ"га йўл олиши керак эди. "Кўк-анорранглилар"нинг янги спорт директори Декунинг аралашуви ушбу келишувда ҳал қилувчи омил бўлди — у трансферни блоклаб қўйган.

Гавининг ўзи "Барселона"дан кетишни истамаган, бироқ агар клуб трансферни келишиб олганида, ёш футболчида бошқа чора қолмаслиги мумкин эди.