Италияда 26-тур баҳслари бўлиб ўтмоқда. «Интер» навбатдаги ғалабасини қўлга киритди — бу сафар «Лечче» дарвозасига жавобсиз иккита тўп киритилди. Голлардан бирига муаллифлик қилган Федерико Димарко ўйиндан сўнг ўз таассуротлари билан ўртоқлашди.

«Гол уриш ёқимли, натижадан сўнг енгил тортдим. Ўйин жуда кўп куч талаб қилди, рақиб ҳаракат қилди ва тартибли ўйин кўрсатди. Биз пайшанба куни Норвегиядан қайтиб келгандик, бугун эса майдонга тушишга тўғри келди, лекин биз буни уддаладик», — дея футболчининг сўзларини келтирмоқда fcinter1908.it.

Ушбу муваффақият натижасида Миланнинг «Интер» клуби Италия А Серияси турнир жадвалидаги устунлигини 10 очкогача ошириб олди.