"Ювентус" ҳужумчиси Душан Влахович клуб билан шартномани узайтириш масаласини муҳокама қилади.
Аввалроқ сербнинг Туринни тарк этиши деярли аниқ бўлгани ҳақида хабар берилган эди, аммо яқинда вазият ўзгарди.
Журналист Николо Скиранинг сўзларига кўра, томонлар март ойига учрашув режалаштиришган. "Кекса синёра" раҳбарияти 26 ёшли футболчининг агенти билан унинг ҳамкорлигини давом эттириш борасида келишувга эришишга ҳаракат қилади.
Душан Влаховичнинг "Ювентус" билан амалдаги шартномаси июнь охирида тугайди. Ҳужумчи қолиш учун маошининг сезиларли даражада пасайишига рози бўлиши кутилмоқда.
Унга "Барселона", "Милан", "Бавария" ва бошқа клублардан ҳам қизиқиш билдирилган.
