«Бенфика» ҳужумкор ярим ҳимоячиси Жанлука Престианни дисквалификация қилинганига қарамай, Чемпионлар лигаси доирасидаги «Реал»га қарши сафар ўйини учун жамоа билан бирга йўлга чиқади. Бу ҳақда «A Bola» нашри хабар бермоқда.
Аввалроқ «Бенфика» УЕФА томонидан Престианнининг битта ўйинга вақтинча четлатилгани юзасидан апелляция бериш ниятида эканлигини маълум қилган эди.
Эслатиб ўтамиз, УЕФА Винисиус Жуниор томонидан Престианнига нисбатан ирқчилик бўйича қўйилган айблов юзасидан суриштирувни давом эттирмоқда. Дастлабки хулосаларга кўра, аргентиналик футболчи томонидан камситиш ҳолати кузатилган деб топилган, шу сабабли УЕФА уни вақтинчалик четлатиш ҳақида қарор чиқарган эди.
«Реал» чоршанба куни, 25 февраль санасида ўз майдонида «Бенфика»ни қабул қилади. Лиссабонда кечган биринчи баҳсда мадридликлар 1:0 ҳисобида зафар қучишган.
