«Манчестер Юнайтед» бош мураббийи Майкл Кэррик «Эвертон» устидан қозонилган ғалабадан (1:0) сўнг жамоа дарвозабони Сенне Ламменснинг ўйини ҳақида ўз фикрларини билдирди.

BBC хабарига кўра, Кэррик «Юнайтед»даги собиқ жамоадоши Эдвин ван дер Сар телевизор орқали Англия терма жамоаси ва «Ливерпуль» собиқ футболчиси Жейми Каррагер билан биргаликда ўйинни таҳлил қилганидан хабар топган. Матбуот анжумани давомида Кэррик икки дарвозабон ўртасида ўхшашлик бор-йўқлиги ҳақидаги саволга эҳтиёткорлик билан жавоб берди.

«Гапираётган гапларимда эҳтиёт бўлишим керак. Уларни солиштиришни истамайман, чунки бу Сеннега нисбатан адолатсизлик деб ҳисоблайман. Аммо ўхшашликлар, шубҳасиз, бор. Дарвозабон ишончли ва таянса бўладиган бўлиши лозим. У хаос (тартибсизлик) келтириб чиқариш ўрнига, уни бартараф этиши ва вазиятни тинчлантириши керак. Ўйлайманки, Сенне айнан шундай.

Баъзида у жуда вазмин ва камсуқум, лекин унинг ичида ҳақиқий "пўлат" ирода бор. Баъзилар учун бу катта роль, ўз муҳитингда ўзингни қулай ҳис қилиш муҳим. Бунинг учун гоҳида вақт керак бўлади, гоҳида эса йўқ, лекин у хотиржамлик ва ўзини тута билиш қобилиятига эга. Бу унинг олдида ҳаракат қилаётган ўйинчиларга жуда катта ёрдам беради», — дея Кэррикнинг сўзларини келтиради BBC.