"Барселона" афсонаси Андрес Иньеста ўзининг собиқ клуби ушбу мавсумда Ла Лига чемпиони бўлишига ишонишини яна бир бор таъкидлади. У жамоанинг турнир жадвалида пешқадамликни қайтариб олишида бош мураббий Ханси Фликнинг таъсирини алоҳида эътироф этди.
2009 йилги Чемпионлар лигаси финали қаҳрамони — 2018 йилда "Барса"ни тарк этиб, 2024 йилда фаолиятини якунлаган Иньеста — ОАВга берган интервьюсида "блауграна"нинг Мадриднинг "Реал" клуби томонидан бўлаётган кучли босимга қарамай, ўз ўрнини сақлаб қолишига ишонч билдирди.
“Мен учун «Барса» ҳамон асосий фаворит”, — деди Иньеста. “Улар биринчи ўринга қайтишди, кўрамиз, мавсум охиригача буни сақлаб қола олишадими.
Рақобат кучли бўлиши аниқ; Ла Лига доим рақобатбардош мусобақа бўлиб келган. Умид қиламанки, «Барса» яна чемпионликни қўлга киритади”.
Ҳозирда "Барселона" 61 очко билан Ла Лига жадвалида пешқадамлик қилмоқда ва энг яқин таъқибчиси "Реал Мадрид"ни бир очкога ортда қолдирмоқда.
