"Barselona" afsonasi Andres Inyesta o‘zining sobiq klubi ushbu mavsumda La Liga chempioni bo‘lishiga ishonishini yana bir bor ta’kidladi. U jamoaning turnir jadvalida peshqadamlikni qaytarib olishida bosh murabbiy Xansi Flikning ta’sirini alohida e’tirof etdi.
2009 yilgi Chempionlar ligasi finali qahramoni — 2018 yilda "Barsa"ni tark etib, 2024 yilda faoliyatini yakunlagan Inyesta — OAVga bergan intervyusida "blaugrana"ning Madridning "Real" klubi tomonidan bo‘layotgan kuchli bosimga qaramay, o‘z o‘rnini saqlab qolishiga ishonch bildirdi.
“Men uchun «Barsa» hamon asosiy favorit”, — dedi Inyesta. “Ular birinchi o‘ringa qaytishdi, ko‘ramiz, mavsum oxirigacha buni saqlab qola olishadimi.
Raqobat kuchli bo‘lishi aniq; La Liga doim raqobatbardosh musobaqa bo‘lib kelgan. Umid qilamanki, «Barsa» yana chempionlikni qo‘lga kiritadi”.
Hozirda "Barselona" 61 ochko bilan La Liga jadvalida peshqadamlik qilmoqda va eng yaqin ta’qibchisi "Real Madrid"ni bir ochkoga ortda qoldirmoqda.
