"Реал"нинг собиқ яримҳимоячиси Сами Хедира "Бенфика" форварди Жанлука Престианнидан "Реал" вингери Винисиусга нисбатан ирқчилик билан боғлиқ вазиятга изоҳ берди.
Винисиус Престианнини "маймун" деб аташда айблади. Аргентиналик футболка билан оғзини тўсган, шунинг учун лабларидан ўқишнинг иложи бўлмаган.
"Нима бўлганини ҳеч ким аниқ билмайди. Ҳеч қаерда, ҳатто минбарларда ҳам ирқчиликка ўрин йўқ, деган фикрга ҳаммамиз қўшиламиз.
Агар бу сўз айтилган бўлса, унга йўл қўйиб бўлмайди ва терговдан сўнг қаттиқ жазога тортилиши керак.
Вини баъзан одамларнинг жиғига тегиши янгилик эмас. У Криштиану Роналду ва Лионель Месси каби миллионлаб болаларга ўрнак бўлишини тушуниши керак.
Криштиану ҳам фаолиятининг бошида кўп худбинлик қилган... Ўзининг таъсирини англаб етиб, етакчилик ролини ўз зиммасига олмагунча. Бу Вини учун кейинги қадам.
Буларнинг ҳеч бири ирқчилик ҳақоратларини оқламайди. Ҳеч ким бошқа бировни терисининг ранги ёки келиб чиқишига қараб камситишга ҳақли эмас.
Буни шунча марта такрорлашга тўғри келаётгани ачинарли", - деди Сами Хедира.
