«Байер» бош мураббийи Каспер Юльманн 2025/2026 йилги мавсум УEФА Чемпионлар лигаси плей-офф босқичининг жавоб учрашувида «Олимпиакос» билан қайд этилган дуранг (0:0) ҳамда кейинги босқичдаги эҳтимолий рақиблар ҳақида гапирди.

«1/8 финалга чиққанимиздан жуда хурсандмиз. Бироқ етарлича яхши ўйин кўрсата олмадик. 25-дақиқадан бошлаб «Олимпиакос» ҳужумда нимадир қила олишини ҳис қилди. Биз бу ўйинда кўп ҳимояланишни режалаштирмаган эдик, лекин бунга мажбур бўлдик ва вазифани яхши уддаладик. Эҳтимол, бизга бироз энергия етишмагандир, энди уни тиклашимиз керак. «Бавария» ва «Арсенал» ўртасидаги танлов — шунчаки ҳайратланарли, булар Европанинг энг яхши икки жамоасидир. «Арсенал» ҳозирги даражага чиқиши учун йиллар керак бўлди, «Бавария»ни эса бу ерда — Германияда таништиришга ҳожат йўқ. Бизни қийин вазифа кутмоқда, аммо биз уни ҳал қилишни истаймиз», — дея Юльманннинг сўзларини келтиради УEФА расмий сайти.

Икки ўйин натижасига кўра «доришунослар» мусобақанинг 1/8 финалига йўл олишди ва у ерда «Арсенал» ёки «Бавария» жамоаларидан бири билан тўқнаш келишади.