Сўнгги ҳафталарда Килиан Мбаппе ноқулайлик билан ўйнаб келаётган эди, энди эса бу кучли оғриққа айланди. Француз «Реал»нинг яқин орадаги ўйинларини ўтказиб юборади ва Мбаппенинг айнан қачон сафга қайтиши ҳозирча номаълум.
«L’Equipe» нашри саҳифаларида Мбаппенинг соғлиғидаги муаммолар ҳақида мақола эълон қилинди. Унда Килианнинг вазиятида «Реал»нинг собиқ мураббийи Хаби Алонсо айбдор бўлиши мумкинлиги айтилади. Муаллифлар ҳужумчида 2025 йилнинг сўнгги кунида аниқланган жароҳатни ёдга олишган.
«Тикланиш учун камида уч ҳафта талаб қилинарди. Мбаппе эса Хаби Алонсонинг «дўстона босими» остида 11 кундан кейин машғулотларга қайтди. Мураббий агар жамоа Суперкубок финалида «Барселона»га ютқазиб қўйса, унинг лавозими хавф остида қолишини тушуниб турарди», — дейилади мақолада.
Эслатиб ўтамиз, бугун, 25 февраль чоршанба куни «Реал» ўз майдонида «Бенфика»ни қабул қилади.
