«Интер Майами» клубининг 38 ёшли аргентиналик ярим ҳимоячиси Лионель Месси фаолиятининг илк йилларида фуқаролигини ўзгартириш эҳтимоли ҳақида сўзлаб берди. Унинг таъкидлашича, Испания унинг шахсига катта қизиқиш билдирган ва ўз терма жамоасида ўйнашга кўндиришга ҳаракат қилган.
«Маълум бир вақтда Испания терма жамоаси вакиллари мен билан боғланишган. Улар мени кўндиришга ҳаракат қилишди. Мен аргентиналикман, лекин «Барселона»га жуда ёш вақтимда келганман. Испания учун ўйнаш имконияти бор эди, лекин мен доим Аргентина шарафини ҳимоя қилишни хоҳлаганман», — дея Мессининг сўзларини «The Touchline» нашри Х ижтимоий тармоғида келтирмоқда.
Месси Аргентина терма жамоасида 2005 йил 17 августда Венгрияга қарши ўйинда дебют қилган. Ушбу баҳсда у 64-дақиқада майдонга тушган, бироқ рақибнинг томоқ қисмига қўпол зарба бергани учун бир дақиқа ўтмасдаёқ майдондан четлатилган эди. Муваффақиятсиз стартга қарамай, Месси миллий жамоа сафида 196 та ўйин ўтказиб, 115 та гол урди. Унинг ютуқлари орасида иккита Америка Кубоги ва 2022 йилги Жаҳон чемпионатидаги ғалаба мавжуд.
