«Бенфика» бош мураббийи Жозе Моуриньо Мадриднинг «Реал» клубига қайтиши мумкинлиги ҳақидаги хабарлар фонида ўз келажаги борасида фикр билдирди.

«Ҳеч ким “Бенфика”ни мен билан шартномани узайтиришга мажбур қилгани йўқ. Шартномада менга хоҳласам кетиш имконини берадиган банд бор. Президентга нисбатан ҳеч қандай эътирозим йўқ.

Ҳозирги пайтда “Бенфика”да қолиш эҳтимолим 99 фоизни ташкил қилади, чунки яна бир йиллик шартномам бор. Клуб менга янги шартнома таклиф қилди, ҳали уни кўрмадим, аммо агентим таклиф жуда яхши эканини айтди.

“Реал”га келсак, ҳозирча менда аниқ ҳеч нарса йўқ. Бу агент Жорже Мендеш ҳамда клуб раҳбарияти ўртасидаги музокаралар», — деди Моуриньо.

Аввалроқ ОАВда португалиялик мутахассиснинг «Реал»га қайтиши деярли ҳал бўлгани ва расмий эълон мавсум тугагач берилиши мумкинлиги ҳақида хабарлар тарқалган эди.

Эслатиб ўтамиз, Моуриньо 2010–2013 йилларда «Реал»ни бошқарган. Унинг қўл остида мадридликлар Испания чемпионати, Кубоги ва Суперкубогини қўлга киритган.