«Манчестер Сити» клуби Хосеп Гвардиолага ўринбосар топиб бўлди. Аввалроқ тахмин қилинганидек, испаниялик мутахассиснинг ўрнини Энцо Мареска эгаллаши керак.
Инсайдер Николо Скиранинг хабар беришича, «шаҳарликлар» италиялик мутахассис билан принципиал келишувга эришган: томонлар шартномани яна бир йилга узайтириш имконияти билан 2028 йилгача мўлжалланган контрактни келишиб олишди. Агар Гвардиола кетишга қарор қилса, ушбу келишув июль ойида кучга киради.
Энди ҳамма нарса Пепнинг ўзига боғлиқ. Марескага эса фақатгина «Сити»нинг амалдаги бошқарувчиси чиқарадиган қарорни кутиш қолмоқда. Эслатиб ўтамиз, италиялик мутахассис бундан аввал «Челси»да фаолият юритган ва шу йилнинг январь ойида истеъфога чиқарилган эди.
