«Галатасарой» етакчиси Виктор Осимхен Чемпионлар лигаси 1/8 финалига йўл олган сенсацион ғалабадан сўнг баёнот берди. Куни кеча Истанбул клуби ўтиш ўйинларида «Ювентус»ни мағлуб этди. Икки ўйин натижасига кўра умумий ҳисоб — 7:5 Туркия клуби фойдасига ҳал бўлди.

Осимхен «Галатасарой» мухлисларига миннатдорчилик билдирди. Шу билан бирга, нигериялик футболчи жамоа ҳали кўп жиҳатлар устида ишлаши кераклигини таъкидлади.

«Бу қийин бўлишини, «Ювентус» мухлислари ҳаётимизни ҳақиқий даҳшатга айлантиришини билардим. «Галатасарой» мухлисларига ҳам раҳмат айтаман. Мен уларнинг овозини эшитиб турдим ва уларнинг уйга маюс ҳолда қайтишларини истамадик. Биз буни уддалашимиз керак эди, лекин очиғини айтсам, ҳали кўп нарсаларни яхшилашимиз лозим», — дея Осимхеннинг сўзларидан иқтибос келтирмоқда УЕФА расмий сайти.