"Реал" дарвозабони Тибо Куртуа "Бенфика" устидан қозонилган ғалаба (2:1) ва жамоанинг Чемпионлар лигаси 1/8 финалига чиққанини таҳлил қилди.
"Престианни ўйнамагани сабабли, улар ўнг қанот вингеридан фойдаланишмади. Риос кўпроқ марказда ўйнади ва бу бизга муаммо туғдирди. Улар жуда кўп ҳаракат қилишди; ҳимоячиси юқорига чиқди ва очиқ ҳудуд пайдо бўлди, биз эса у ерни ёмон ёпдик, назаримда, биринчи гол айнан шу сабабли урилди. Кейин, иккинчи бўлимда яхшироқ ҳимояландик. Танаффусда тузатишлар киритдик, лекин биринчи бўлимда анча қийналганимиз бор гап. Уларнинг голи бироз омадсизлик бўлди, чунки Асенсиога тегди, мен қайтардим ва тўп тўғри уларнинг футболчисига бориб тушди. Ўйлайманки, кейинроқ ўйинимизни яхшиладик, ҳисобни тенглаштирдик ва бу муҳим эди".
– Чемпионлар лигасига даъво қилиш учун янада ишончлироқ бўлиш керакми?
"Биз ишончлимиз. Чемпионлар лигасида рақиблар вазиятлар яратиши нормал ҳолат. Биз ўйинимизга тузатишлар киритишимиз керак ва мураббий ҳамда видеотаҳлил ёрдамида буни албатта амалга оширамиз. Сўнгги ҳафталарда анча барқарор бўлдик, лекин ўйин нуқтаи назаридан бизга тўп билан ҳаракатланишда равонлик ва тезлик етишмаяпти. Тўпни кўпроқ бир қанотдан иккинчисига ўтказишимиз керак. Агар ҳужумга жуда узоқ тайёргарлик кўрсак, рақиб ўзини қулай ҳис қилади, айнан шу ерда биз тезроқ ўйнашимиз лозим. Танаффусда Арбелоа бизга шуни айтди. Иккинчи бўлим яхшироқ ўтди. Биз унчалик яхши ўйнамаяпмиз, лекин асосийси — ғалаба".
– Ҳисоб 1:1 бўлиб турган пайтдаги ҳал қилувчи сейвингиз ҳақида...
"Фотосуратни кўрдим ва ҳақиқатда яхши сейв амалга оширганимга амин бўлдим. Тўп оёқларим орасидан ўтди ва мен уни тўхтатишга тайёр ҳолатда эдим. Ўйлайманки, бу волейбол ўйнаган ота-онамдан ўтган генларимда бор ва болалигимда ўзим ҳам волейбол билан шуғулланганман. Бу мен "Челси"да қўллаган техника. Биз баъзида мана шундай техникаларни ишлатамиз ва улар натижа беради", деди Куртуа.
