Сафарда «Атлетико»дан қабул қилинган 0:4 ҳисобидаги мағлубиятдан сўнг, «Барселона» учун Испания Кубоги финалига чиқиш жуда қийин бўлади. Шунга қарамай, каталонияликлар бош мураббийи Ханс-Дитер Флик муваффақиятга ишонмоқда.
«Бу қийин, аммо иложи бор. Биз ишонишимиз керак — энг муҳими шу. Бунда «Камп Ноу»нинг роли катта бўлади. Агар биз бирдам бўлсак, ўз стадионимизда ҳамма нарсани амалга ошириш мумкин», — деди Флик «Барселона» клуб телеканалига берган интервьюсида.
«Барселона» ва «Атлетико» ўртасидаги жавоб учрашуви сешанба куни, 3 март куни бўлиб ўтади. Ўйин Тошкент вақти билан тунги соат 01:00 да (4 мартга ўтар кечаси) бошланади.
Унгача эса «Барселона» навбатдаги ўйинини 28 февраль куни Ла Лига доирасида «Вильярреал»га қарши ўтказади.
