Лондоннинг "Арсенал" клуби бош мураббийи Микель Артета жамоасининг жорий мавсумда "квадрупл" (бир мавсумда тўртта асосий совринни қўлга киритиш) қайд этиши мумкинлиги ҳақидаги фикрлари билан ўртоқлашди.
Ҳозирда "тўпчилар" Премьер-лигада пешқадамлик қилмоқда ва барча турнирларда, жумладан, Чемпионлар лигасида ҳам ўз юришини давом эттирмоқда.
"Квадруплни қўлга киритиш қанчалик қийин? Илгари кимдир буни уддалаганми? Бу саволнинг ўзи жавоб бўла олади. Ҳозир биз ўйиндан ўйинга ўтишимиз ва шу руҳда давом этишимиз керак. Якунда нимага эришишимизни вақт кўрсатади", — деди Артета матбуот анжуманида.
Эслатиб ўтамиз, якшанба куни "Арсенал" ўз майдонида Англия чемпионати доирасида "Челси"ни қабул қилади. Учрашув Тошкент вақти билан 21:30да бошланади.
