"Арсенал" бош мураббийи Арсен Венгер бошланаётган мавсумда Англия чемпионлиги учун курашадиган жамоалар кам бўлмаслигини таъкидламоқда. Бу ҳақда француз мутахассиси Goal.com`га берган интервьюсида маълум қилган.
"Ҳозирдан мусобақа олтин медали учун курашувчилар сони кўп бўлишини айтиш қийин эмас. Бошқа Европа миллий чемпионатлари билан солиштирадиган бўлсак, АПЛ - мавсум бошидан ким унда ғалаба қозонишини айтиб бўлмайдиган ягона чемпионат. Мана шунинг учун ҳам у қизиқарли.
Энг юқори поғона учун 6 жамоа кураш олиб боради деб ҳисоблайман. Бу ўтган мавсумдаги кучли бешлик ва "Ливерпуль". Ҳозирча жамоалардаги мураббийлар алмашинуви қандай оқибатларга олиб келишини билмаймиз, аммо рақиблардан ҳар бири барқарор таркиби билан мақтана олиши мумкин. Шундай экан биз уларнинг мағлубиятини кутиб ўтирмаслигимиз керак", деди Венгер.
