«Манчестер Сити» устози Хосеп Гвардиола чемпионлик учун «Арсенал» билан кечаётган кураш ҳақидаги одатий саволга жавоб берди.

Чоршанба куни «шаҳарликлар» ўз майдонларида «Ноттингем Форест»ни мағлуб эта олишмади (2:2), «тўпчилар» эса параллел кечган баҳсда «Брайтон»дан устун келишди (1:0). Натижада «Сити»нинг лондонликлардан ортда қолиши 7 очкогача кўпайди (Гвардиола жамоасида битта захира ўйини мавжуд).

Ўйиндан сўнг журналистлар Гвардиоладан жамоасининг «Арсенал»ни қувиб ўтишига ёрдам берадиган «кутилмаган бурилишлар»га ишониш-ишонмаслиги ҳақида сўрашди: «Олдинда ҳали ўйинлар кўп, шунинг учун биз шунчаки курашишда давом этишимиз керак», — деб жавоб берди испаниялик мутахассис TNT Sports телеканалига берган интервьюсида.

Шанба куни «Манчестер Сити» Англия Кубоги доирасида «Ньюкасл»га қарши майдонга тушади.