АҚШ президенти Дональд Трамп «Интер Майами» жамоасини Оқ уйда қабул қилиш чоғида Лионель Месси билан қўл бериб кўришар экан, уни энг буюк футболчи деб атади.
Давлат раҳбари: «Барча даврларнинг энг буюк ўйинчиси ким — Пелеми ёки Месси?» — дея савол берди.
«Интер Майами» делегацияси ва ташриф буюрган журналистлар бир овоздан: «Месси!» — деб жавоб қайтаришди. Бунга жавобан Трамп: «Қўшиламан. Менимча, у — энг буюги», — деди.
«Интер Майами» клуби МЛС Кубогидаги ғалаба муносабати билан Оқ уйга ташриф буюрди. Месси АҚШ президенти билан илк бор учрашди. Эслатиб ўтамиз, 2025 йилнинг январь ойида, мамлакатни Жо Байден бошқариб турган вақтда, аргентиналик юлдуз президентлик медалини топшириш маросимида иштирок эта олмаган эди.
