2022 йилдан буён мамлакат ёшлар терма жамоалари билан ишлаб келаётган Муҳаммад Уаби Марокаш миллий терма жамоасининг янги бош мураббийи этиб тайинланди. У мазкур лавозимда марокашликларни 4 йил давомида бошқарган Валид Реграгининг ўрнини эгаллади.
Уабининг мураббийлар штабидан аввалроқ «ПСЖ», «Рома», «Тоттенхэм» ва «Лилль» клубларида ёрдамчи мураббий сифатида фаолият юритган португалиялик мутахассис Жоао Сакраменто ҳам жой олади.
«Марокаш Қироллик футбол федерациясининг ишончига сазовор бўлиш мен учун катта шараф. Биз аниқ методология ва умумий амбицияларга таянган ҳолда астойдил меҳнат қиламиз: ўйиндан ўйинга ўсиб бориш, миллий терма жамоанинг бўлажак мусобақаларда сифат жиҳатидан ижобий сакрашни амалга ошириши ҳамда давлат раҳбари ва Марокаш халқининг умидларини оқлаш учун кундалик ишимизда юқори стандартларни жорий этамиз», — деб таъкидлади Уаби.
Марокаш терма жамоаси ЖЧ-2026 гуруҳ босқичидаги «C» гуруҳида Бразилия, Шотландия ва Гаити жамоаларига қарши майдонга тушади.
