«Ан-Наср» ҳужумчиси Криштиану Роналду жароҳатдан кейинги тикланиш жараёни қандай кечаётганини кўрсатди ва мухлисларга мурожаат қилди.

Португалиялик футболчи ўзининг тикланиш жараёнидан суратни ижтимоий тармоқларда эълон қилди.

Суратда у машғулот залидаги массаж столида ўтирган ҳолда тасвирланган. Унинг оёғига криотерапия учун мўлжалланган ускуна — совитиш тизимига эга махсус компрессион қоплама ўрнатилган.

Роналду «Ан-Наср» машғулот кийимида бўлиб, кулган ҳолда бош бармоғини кўтариб турибди. Аввалроқ у тикланиш жараёнини Испанияда ўтказиши ҳақида хабар берилган эди.

«Тикланяпман ва бугунги ўйинни томоша қилишга тайёрман. Олға, “Ан-Наср”!», — деб ёзди Роналду ижтимоий тармоқларда.

Бугун «Ан-Наср» «Неом»га қарши Саудия Арабистони чемпионати доирасида майдонга тушади.