Мадриднинг «Реал» клуби ҳужумчиси Килиан Мбаппе ҳамон жароҳатидан тикланиш жараёнини ўтамоқда.

Франциялик футболчи Чемпионлар лигаси 1/8 финали доирасидаги «Сантьяго Бернабеу»да бўлиб ўтадиган «Манчестер Сити»га қарши дастлабки учрашувда аниқ иштирок этмайди, шунингдек, Англиядаги жавоб ўйинини ҳам ўтказиб юбориш хавфи бор. «Реал» раҳбарияти юлдуз форварднинг имкон қадар тезроқ майдонга қайтишини ва ҳал қилувчи баҳсларда жамоага ёрдам беришини истамоқда, бироқ футболчининг атрофидагилар бундай ёндашувга қўшилишмаяпти. Cadena SER нашрининг хабар беришича, Мбаппега яқин инсонлар у тўлиқ тикланмагунча майдонга тушмаслигини билдиришган. 27 ёшли футболчи Жаҳон чемпионати олдидан соғлиғини хавф остига қўйишни истамаяпти.

Килиан Мбаппе жорий мавсумдаги 33 та ўйинда ўз ҳисобига 38 та гол ва 6 та голли узатмани ёздириб қўйишга улгурди.