ФИФА президенти Жанни Инфантино бўлажак 2026 йилги Жаҳон чемпионати фаворитлари ҳақида ўз фикрини билдирди. У Испания терма жамоаси ғолибликка асосий даъвогарлардан бири эканини таъкидлади.
«Испания — бошқа жамоалар қаторида, албатта, асосий фаворитлардан бири. Биз Испаниянинг кучли томонларини яхши биламиз. Рейтингда биринчи ўринни эгаллаб турган жамоа Жаҳон чемпионати фаворити бўлиши шарт», — дея Инфантинонинг сўзларини келтиради AS нашри.
2026 йилги футбол бўйича Жаҳон чемпионати 11 июндан 19 июлга қадар учта мамлакатда: АҚШ, Канада ва Мексикада бўлиб ўтади. Турнирнинг финал босқичи қуръа натижаларига кўра, Испания терма жамоаси «Н» гуруҳидан жой олди ва у ерда Кабо-Верде, Саудия Арабистони ҳамда Уругвай билан куч синашади.
