МЛС «Коламбус Крю» клубининг собиқ футболчилари Йо Йебоа ва Деррик Жонсни умрбод дисквалификация қилди.

Лига аввалроқ ҳамкорларидан шубҳали тикишлар (ставкалар) ҳақида огоҳлантиришлар олганини ва суриштирув ўтказиш учун юридик фирма ёллаганини маълум қилди.

«Тергов натижаларини ўрганиб чиқиб, МЛС шундай хулосага келдики, футболчилар 2024 ва 2025 йилги мавсумлар давомида футболга, жумладан, ўз жамоалари иштирокидаги ўйинларга фаол равишда пул тикиб келишган. Бир ҳолатда, ҳар икки ўйинчи 2024 йил 19 октябрдаги учрашувда Жонснинг сариқ карточка олишига пул тикишган ва у ҳақиқатан ҳам ўша ўйинда огоҳлантирилган», — дейилади баёнотда.

Лиганинг таъкидлашича, Жонс ва Йебоа катта эҳтимол билан тикишлар бўйича бир-бирлари билан маълумот алмашган бўлишса-да, футболчиларнинг ҳаракатлари ўйин натижаларига таъсир қилгани бўйича ҳеч қандай далил топилмаган.

Йебоа 2022 йилдан 2024 йилгача «Коламбус Крю»да тўп сурган, 2025 йилда эса «Лос-Анжелес»га ўтган эди. Ҳозирда у Хитойнинг «Циндао Хайню» жамоасида ўйнамоқда.

Деррик Жонс эса 2024 йилдан 2025 йилгача «Коламбус Крю» шарафини ҳимоя қилган. Айни дамда у эркин агент мақомида бўлиб турибди.